Misneach - Gearrscannán

Seo gearrscannán faoi Misneach atá déanta ag Ciarán de Búrca agus Rónán Ó hArrachtáín. Díríonn sé ar Mhisneach na Gaillimhe dáiríre agus ar an turas a thug muid go dtí Béal Feirste ar an Lá Dearg anuraidh.

Bainigí sult as!

An G-Spota ar ais aríst!

Teacht le chéile na nGael i gcathair na Gaillimhe.

Ceol úr leis an fhile is fearr in Éirinn Séamus Barra Ó Súilleabháin agus a chomrádaí ó Ghaoth Dobhair Rob Ó Maoilchiaráin.

Beidh cuid de na ceoltóirí traidisiúnta is fearr ó Ghaillimh agus ó áiteacha níos faide i gcéin ann freisin.

Buailfidh na boic ó Cúla Búla isteach chugainn le haghaidh cúpla fonn a chasadh, ina measc ceann nó dhó úr-nua agus Gaelach!

Faoi dheireadh na hoíche beidh sé de phleisiúr againn éisteacht le cuid ceoltaí DJ Rob.

Bí ann agus beidh an craic ann!

Saor-chead isteach!

''Céard is fiú an Ghaeilge?'' / ''Stair an Ghrúpa Misneach''

Beidh caint phoiblí dar teideal ''Céard is Fiú an Ghaeilge / Stair an Ghrúpa Misneach'' ar siúl ag Misneach ar an Luan, an 23ú Feabhra ar 7i.n. i dTéatar Chearbhalláin in Áras na Gaeilge OÉ Gaillimh.

Is iad Ciarán Mac Giolla Bhéin agus Eoin Ó Murchú na haoichainteoirí a bheas ag labhairt ar an ócáid.

Is as Béal Feirste Ciarán Mac Giolla Bhéin. Is gníomhaí lán-aimseartha Gaeilge atá ann. Oibríonn sé ar son Chonradh na Gaeilge i gcosaint na teanga ó thuaidh.

Is iriseoir proifisiúnta é Eoin Ó Múrchú. Bhí sé páirteach i Misneach le linn Mháirtín Uí Chadhain. D’oibrigh sé do Raidió na Gaeltachta agus do RTÉ.

Cinnte gur caint shuimiúil spreagúil a bheas ann agus beidh am ag an deireadh fá choinne ceisteanna agus díospóireachta!

Beidh tae ann fosta.

An t-Irisleabhar 'MIONLACH' anois i gCló!

Faoi dheireadh thiar thall tá irisleabhar nua dar teideal 'MIONLACH' anois i gcló ag Misneach agus i láthair na huaire tá sí á dáileadh amach ar fud na tíre. Is i nGaillimh amháin atá sí ar fáil anois ach faoi cheann seachtaine nó mar sin beidh sí á díol ar €1/£1 i dTír Chonaill, i mBéal Feirste, i mBaile Átha Cliath agus i gCiarraí.

Tá an iris 'Mionlach' ar fáil ar fud Chathair na Gaillimhe sna siopaí seo a leanas, Charlie Burn's, Club Árus na nGael (oifig Chonradh na Gaeilge), Bell Book and Candle,  Luck's, O'Brien's agus Maloney's (gala).

In ollscoil na Gaillimhe a foilsíodh an t-irisleabhar a bhuí le cumann Misneach na hollscoile agus neart cúnaimh ón Socsbox.

San iris tá ailt ar chúrsaí reatha, polaitíocht, nuacht idirnáisiúnta, amhráin, filíocht agus tuilleadh.

Go mbaine sibh sult agus tairbhe as!

Cos ar bolg polaitiúil i dTír na mBascach arís

 
Cuireadh ar ceal an triail is deireanaí in éadan 35 ball de cheannaireacht an pháirtí pholaitiúil mhídhleathaigh, Batasuna, inné, an chéad lá den triail, nuair a gabhadh na trí dlíodóirí de chuid na mball Batasuna a bhí ar an bhealach chuig an Chúirt Speisialta Spáinneach i Madrid. Ghabh na póilíní Spáinneacha, An Guardia Civil, 12 dlíodóirí ar fad de chuid na gcimí polaitiúla Bascacha agus ceathrar cuntasóirí moch ar maidin agus cuireadh i leith an dreama a tógadh gur baill de ETA iad. Ar dhuine de na daoine a gabhadh tá urlabhraí an pháirtí den eite chlé ar son neamhspleáchais, Sortu.

I measc na n-oifigí a ndearnadh cuardach orthu bhí oifigí an chearchumainn LAB, eagraíocht atá chomh maith céanna ar son an neamhspleáchais. Tharla seo i ndiaidh mhórshiúil ar son chearta na gcimí polaitiúil a bhí ar siúl Dé Sathairn, a raibh 80,000 duine i láthair ann. Mar bharr ar an donas thóg na póilíní an €90,000 a bailíodh le linn an mhórshiúil. Tá lucht eagraithe an mhórshiúil, Sare, i ndiaidh an t-airgead goidte a éileamh.

Oíche aréir tharla agóidí ar fud Thír na mBascach.

"Réabhlóid Phobail" ag teastáil don Ghaeltacht de reir údar taighde nua

Deir an Dr. Brian Ó Curnáin, duine de na príomhúdar ar an taighde nua ar chumas teanga páistí óga na Gaeltachta, go bhfuil "Réabhlóid Phobail" ag teastáil chun an teanga agus an cultúr Gaelach a thabhairt slán. Ag labhairt dó ar nuacht a haon ar RnaG inné dúirt an Dochtúir Ó Curnáin go bhfuil gá le "tearmainn teanga" a bhunú agus réabhlóid a chur i gcrích chun todhchaí na teanga a chinntiú.

Léiríonn an taighde nua, Iniúchadh ar an gCumas Dátheangach: An sealbhú teanga i measc ghlúin óg na Gaeltachta, go bhfuil cumas  i bhfad díos fearr sa mBéarla ná sa nGaeilge ag greabairí óga i gcuid de na ceantair ghaeltactha is láidre sa tír, cé gurb í an Ghaeilge an teanga atá acu sa mbaile.

Ar ndó, tagann ráiteas Uí Churnáin agus an taighde nú seo leis an méid atá le rá ag Misneach le fada an lá. Agus an ghéarchéim theanga seo ag titim amach os ár gcomhair agus an ionsaí fiachmhar atá ag lucht an rachmais agus na cumhachta ag déanamh orainn le blianta anuas ó thaobh ciorruithe agus taillí, is mithid dúinn athrú mór a bhaint amach sa gcaoi a cáitear le gnáthdaoine na tíre - ó thaobh cultúir agus daonnacht de.


Éist leis an mír nuachta fhéin anseo:
http://www.rte.ie/radio/utils/radioplayer/rteradioweb.html#!type=radio&rii=17%3A20685761%3A1719%3A20%2D11%2D2014%3A

Agus tá tráchtaireacht ar an ráiteas seo ar fáil ar an suíomh nuachta nua, tuairisc.ie:
http://tuairisc.ie/reabhloid-phobail-de-dhith-i-bhfianaise-taighde-gaeltachta/

Bella Ciao / Slán a Chroí

Amhrán Mór Frith-fhaisisteach an Domhain Aistrithe go Gaeilge

Don chéad uair ariamh beidh an t-amhrán clúiteach frith-fhaisisteach Iodálach ''Bella Ciao'' á cheol go beo beithíoch i dteanga bhlasta na Gaeilge. Cúla Búla, banna nua-thrad as Gaillimh a bheas ag ceol an amhráin seo Déardaoin beag seo in Árus na nGael. Séamus Barra Ó Súilleabháin agus Seanán Mac Aoidh, beirt ghníomhaithe de chuid Misneach a d'aistrigh an t-amhrán ar na mallaibh.

Buailigí isteach chuig Club Árus na nGael ar shráid Dhoiminic i gCathair na Gaillimhe ar an 13ú Samhain ar a 10 a chlog san oíche go gcloisfidh sibh an t-amhrán breá seo á cheol i nGaeilge don chéad uair ariamh beo ar an stáitse.

Seo iad na focla sa chaoi go mbeidh sibh in ann bheith páirteach sa chanadh ar an oíche údaí agus le haghaidh laethanta eile níos faide anonn!

Ar maidin moch
do mhúscail mé
o bella ciao bella ciao

bella ciao ciao ciao

Ar maidin moch

do mhúscail mé

agus fuaireas an t-ionróir

A pháirtínigh

tabhair ar shiúl mé
bella ciao bella ciao

bella ciao ciao ciao

A pháirtínigh
tabhair ar shiúl mé
is sa bhearna baoil atáim.

Má fhaighim bás
mar pháirtíneach
slán a chroí slán a chroí

slán a chroí chroí chroí

Má fhaighim bás

mar pháirtíneach

déan tusa mé a chur

Déan mé a chur

thuas ar an tsliabh

bella ciao bella ciao

bella ciao ciao ciao

Déan mé a chur

thuas ar tsliabh

faoi scáth an bhláithín úd

Is na daoine

ag dul thar bráid

bella ciao bella ciao

bella ciao ciao ciao

is na daoine

is iad a' rá

nach álainn an bláth úd

Seo é bláth

an pháirtínigh

slán a chroí slán a chroí

slán a chroí chroí chroí

Seo é bláth

an pháirtínigh

fuair bás ar son saoirse.